خمس مهارات اساسيه لكل انواع التجاره

خمس مهارات اساسيه لكل انواع التجاره

١- فن اداره المال ،،

راح اتكلم بشكل عام
المال هو اهم شي فالتجاره ،، لكن مو مهم ان الواحد يكون عنده راس مال كبير عشان يقدر يفتحله مشروع
الاهم هو ان الواحد يعرف كيف يسيطر على نفسه في الصرف ،،
ما تاخذين فلو س المشروع وتروحين تشترين فيهم حق العيد ! لا
ولا تقولين انا محتاجه هالشهر وخلني اصرفهم

بيزات البزنس حق البزنس وبس
لازم تعرفين الرياضيات اللي كانوا يدرسونه اياه فالمدرسه
وجدول الضرب والقسمه
والنسبه
وللي ما تحب الرياضيات الحمدلله ان توفر لنا آله حاسبه بكل سهوله نحسب منها

خليلج جدول فالكمبيوتر تحسبين منه انتي كم صرفتي على كل شي فالمشروع
وكم بتبيعينه
وكم بتاخذين على مجهودج وتعبج

مثلا شريتي قطعه ب ٢٠٠
وفصلتيها عند الخياط ب ٢٠٠
وانتي طلعتي الموديل وخسرتي بترول وتبين نسبه مثلا حطيلج ٢٠
وكل وحده تحط المبلغ اللي تحس انه يناسبها مع مراعاه جوده المنتج
يعني اذا كان الخياط هو اللي خيط مو انتي مافي داعي تزيدين ١٠٠ ! حرام

وممكن بعد تزيدين درهم او ٥ دراهم
في حاله حدوث خسائر
مثلا فالنت شي وايد بنات يطلبون ويكنسلون وترد الطلبيه للتاجره وتكون خسرانه فيها
(انا ما صارلي جي الحمدلله) لكن لو كنتي محطيه احتياط ممكن هذا الاحتياط يفيدج في حاله الخساره

يصير عندنا
تكلفه المنتج = سعر القطعه + الخياطه
٢٠٠ + ٢٠٠ = ٤٠٠
تعبج على التصميم والمراكض = ٢٠
احتياطي الخساره = ٥

التكلفه الاجماليه = ٤٠٠ + ٢٠ + ٥ = ٤٢٥ درهم

واذا في عندنا بنات دارسين محاسبه ياريت لو يفيدونا في هالنقطه

المشاريع المنزليه تعالي واختاري(نجوم مشرقه)

٢- مهاره التسويق للمنتج


مهما كان حجم المنتج ،، كبير ولا صغير ،، متقن او مال اي كلام ،، حلو ولا بمستوى عادي ما راح يصير شي ولا راح تبيعين منه الا اذا كان هناك تسويق ناجح
ياما ناس منتجاتهم عاديه جدا لكن تستغربين نجاحهم الباهر ،، الفكره هي فالتسويق

خبري كل اللي تعرفينهم عن المنتج
يعني حتى لو كان شي واحد
صنعتي عطر مثلا

خبري خواتج امج انشري الخبر فالفريج كله

حطي دعايات فالوسيط والجرايد
نزليلج مواضيع فالنت
لا تستهينين فالمنتج حتى لو كان واحد

وشي ثاني ،،
هذا المنتج هو مثل ولدج ،،،
لو سرتي بيت ناس ،، وبتودين ولدج الصغير معاج ،،، تسبحين وتبدلين وتلبسينه احس ما عنده ،، وتحطيله العطر والعود
نفس الشي بضاعتج ،،،،،،

ابرزيها بحيث اللي يشوفها يقول ما شالله

صوريها ،، وخلي الصور واضحهتبين التفاصيل كلها
انا ما انصح تصوير المنتجات فكاميرات الموبايل لان شي منها ما يكون واضح وشي منها يطلع شوي مهزوز
واللي يطلع الوانه غير
لو ما عندج كاميره محترفه ممكن تطلبين هالشي من ربيعتج تصورلج
او حتى ممكن تشلين منتجاتج وتسيرين استديو وتطلبين منه تصوير واضح ودقيق

طريقه العرض هي اهم شي يلاحظه الزبون قبل ان يحدد هل هذا المنتج زين ولا لا ،،،
وهلله هلله في منتجاتكم (عيالكم) هههه


المشاريع المنزليه تعالي واختاري(نجوم مشرقه)
٣- مهاره اداره الذات
العمل من المنزل يمكن يكون اصعب من الشغل في الدوائر الحكوميه ولا الشركات
لان اذا كنتي تشتغلين بروحج لازم تكون عندج مهاره في انج تسوين كل شي بنفسج
يكون عندج القدره انج تحفزين نفسج للآحسن
انتي راح تكونين مديره نفسج
انتي راح تعطين نفسج دافع انج تكملين
انتي راح تواسين نفسج اذا فشلتي ولا حد استهان بالمنتج مالج
انتي راح ترتبين كل امور حياتج بحيث ان ما يصير اي خلل مع وجود البزنس


المشاريع المنزليه تعالي واختاري(نجوم مشرقه)
٤- فن اداره الوقت
هذا شي جدا مهم! انج ما تخلين كل يومج للبزنس وبس
وتكون عندج القدره انج توفقين من بين البيت والعيال او الزوج او الدراسه بدون ما يتعطل طرف فالموضوع

تذكري ان التجاره المنزليه كان هدفها قتل وقت الفراغ
وليس المال على حساب ريلج وعيالج

اللي شغله برع البيت
ترجعين البيت وخلاص انتهى
لكن اللي شغله داخل البيت
ما راح ينتهي بساعه ولا ساعتين
خصوصا لما تجربين النجاح راح تحبين انج طول اليوم تنتجين وتعرضين منتجاتج

لكن هذا ما ننصح فيه

خل تكون عندج موازنه فالامور
مثلا فتره الصبح عيالج فالمدرسه ،، ريلج فالدوام ،، خلصتي من شغل البيت ،، او وكلتي البشكاره بالشغل
هني تبدين تشتغلين ،،،،
ومن الافضل يكون عندج جول بالمواعيد
مثلا يوم الاحد : راح انتج منتج يديد
يوم الاثنين : راح احسب تكاليف المنتج وارتب حساباتي
مع تدوين كل شي
يوم الثلاثا : ادوريلج طريقه مبتكره في الاعلان ،، وتصورين المنتج ،، وترتبين الصور ،، وترتبين كل امورج ،، من ناحيه من راح يوصل ؟ وكيف طريقه الدفع
يوم الاربعا : تنزلين الاعلان وتخبرين الكل
يوم الخميس : اكيد راح تكون في اتصالات تردين عليها بخصوص المنتج

هذا جدول عالراحات ! يعني اذا كنتي بس بتشتغلين ساعتين فاليوم
وممكن في ناس لو كان منتجها ما يحتاج شغل وايد تخلصه في يوم واحد وتصوره وتنزل الاعلان

حسب انتي وظروفج


المشاريع المنزليه تعالي واختاري(نجوم مشرقه)

٥- المهاره المكتبيه:

انتي مديره نفسج ،، وانتي بعد سكرتيره نفسج
من لافضل تكونين تعرفين في الامور المكتبيه ،،، تعرفين وين تحطين اغراضج اللي تستعملينها فالبزنس
اذا تحتاجين تسوقين فالنت تحتاجين المعرفه بشؤون النت ،، مثل استخدام المنتديات والايميل وطريقه رفع الصور
دايما مكان العمل يكون مرتب ومنظم عشان يعطيج دافع اكبر للشغل
ولا تستهينين فالشي ،،،
لان النظام يعطيج طاقه لانطلاق الافكار الجديده

وافضل لو ما تعتمدون عالبشاكير في ترتيب مكان العمل
لان هم وايد يضيعون !!