علوم سادس ابتدائى --مالك وانس

الدرس الاول عندنا اسمه( الكتلة والوزن)

دايما بنلاقى ان الكتلة والوزن دول مصطلحين بتستخدمهم كتير فى حياتنا اليومية سواء عند البيع او عند الشراء

بس للاسفاننا دايما بنخلط بين المصطلحين وبنستخدمهم بطريقة غلط زى ايه مثلا؟

هاقولوكوا احنا دايما بنقول وزن الدقيق 5 كيلو جرام وده طبعا غلط المفروض نقول كتلة الدقيق 5 كيلو جرام

وبنقول كمان وزن الموز 2 كيلو جرام و ده برده غلط المفروض نقول كتلة الموز 2 كيلو جرام

والفرق بين الكتلة والوزن هنعرفه من خلال دراستنا للوحدة دى ان شاء الله
وهنشوف قد ايه انهم مختلفين عن بعض وانا دايما كنا بنستخدم المصطلح الغلط
عند البيع والشراء

اول حاجة هنبدا بيها هى الكتله

وتعريف الكتلة هو: مقدار ما يحتويه الجسم من المادة

وهنفهم دة من خلال المثال الجاى :

احنا قولنا ان الكتلة هى مقدار ما يحتويه الجسم من المادة
وهنفهم ده من خلال المثال:
عندى 10 موزات كتلتهم 275 جرام وعندى 9 موزات كتلتهم 250 جرام

السؤال بقى: يا ترى كتلة ال10 موزات بتساوى كتلة ال9 موزات؟

الاجابة طبعا لا لان كتلة ال10 موزات اكبر من كتلة ال9 موزات

طيب يا ترى بتختلف الكتلة باختلاف كمية الموز؟
الاجابة طبعا نعم لان كل ما كمية الموز بتزيد الكتلة بتبقى اكبر

طيب مثال تانى:

عندى بيض كتلته 120 جرام وعندى كشاف كتلته 120 جرام

السؤال: يا ترى كتلة البيض بتساوى كتلة الكشاف؟
الاجابة طبعا نعم

طيب يا ترى كتلة المادة فى البيض بتساوى كتلة المادة فى الكشاف؟
الاجابة طبعا نعم لانه بما ان الكتلة متساوية يبقى اكيد كمية المادة برضو متساوية

بنلاحظ من المثال الاول : ان كتلة الموز ستتوقف عل كميته ودة معناه ان الكتلة بتتوقف على كمية المادة

وبنلاحظ من المثال التانى: تساوى كتلة البيض مع كتلة الكشاف ودة معناه انهما يحتويان على كميتين متسا ويتين من المادة

الملخص اللى هنذاكره:

تعريف الكتلة: هى مقدار ما يحتويه الجسم من المادة

_تتوقف الكتلة على كمية المادة ( كلما زادت كمية المادة كلما زادت الكتلة)

_ اذا تساوت كتلة جسمان فانهما يحتويان على كميتين متساويتين من المادة

تابع درس ( الكتلة)

احنا قولنا ان الكتلة: هى مقدار ما يحتويه الجسم من المادة

طيب دلوقتى عايزين نتعرف اكتر ع الكتلة ... يا ترى ايه هى وحدة قياسها.. وايه هى الاجهزة المستخدمة فى قياس الكتلة؟

اول حاجة هنعرفها هى وحدة قياس الكتلة: وحدة قياس الكتلة هى الجرام او الكيلو جرام

والكيلو جرام بيساوى 1000 جرام

الاجهزة المستخدمة فى قياس الكتله: تستخدم انواع مختلفة من الموزاين لقياس الكتلة
زى ايه؟

1- الميزان ذو الكفتين ودة ممكن يكون ميزان ذو كفتين عادى زى اللى عند بتاع الخضار وممكن يكون ميزان ذو كفتين حساس زى اللى عند بتاع الدهب

2- الميزان ذو الكفة الواحدة ودة ممكن يكون بمؤشر او يكون رقمى والاتنين بنشوفهم فى السوبر ماركت

بس طبعا فى حاجة مهمة لازم نعرفها : مينفعش اننا نستخدم اى ميزان عشان
نقيس بيه اى كتلة.. يعنى مينفعش استخدم ميزان بياع الخضار عشان اوزن دهب
.. غلط طبعا لان اوزان الدهب بتبقى صغيرة بالجرام وعشان كدة لازم استخدم
ميزان حساس

كتلة الجسم عند التوازن تساوى مجموع كتل الاثقال معلومة الكتلة

ازاى ؟؟؟؟؟؟؟؟؟؟

عشان نعرف هنعمل تجربة بسيطة مع بعض هنحتاج فيها ميزان وموز واثقال(ا\2 ك & اك &2ك)
1- هننضف الميزان كويس ونحطه على حاجة ثابتة منضدة مثلا
2- هنحط الموز فى الكفة الاولى
3- هنحط الاثقال فى الكفة التانية وهنعمل زى البياع بالظبط هنحط النص ونبص
ع الكفة نلاقى الموز لسة هو الاتقل وبعدين نحط الكيلو مع النص نلاقى برضو
الموز هوا الاتقل وبعدين نحط ال2 كيلو مع الكيلو والنص كيلو ونبص ع
الميزان نلاقى الكفتين زى بعض

وبكدة يبقى كتلة الموز بتساوى كتلة 1\2 ك + ا ك + 2 ك ... يعنى بتساوى 3 و 1\2 كيلو
ومنها بنستنتج ان:
كتلة الجسم عند التوازن بتساوى مجموع كتل الاثقال معلومة الكتلة

اخر جزء فى درس انهاردة بقى بيقول:

ان كتلة الجسم مقدار ثابت فى اى مكان من الكون

يعنى كتلة الجسم على سطح الارض هى نفسها على سطح القمر مبتتغيرش

الملخص اللى هنذاكره ان شاء الله:

الكتلة: هى مقدار ما يحتويه الجسم من المادة

_ تقاس الكتلة بوحدة الجرام او الكيلو جرام

والكيلوجرام = 1000 جرام وهو ما يكافىء لتر من الماء

_ قياس الكتلة: تستخدم انواع مختلفة من الموازين لقياس الكتلة مثل

1- ميزان ذو الكفتين ( عادى وحساس)
2- ميزان ذو الكفة الواحدة ( بمؤشر او رقمى)

_ يجب اختيار الميزان الذى يناسب كمية المادة
المراد قياسها فلا يمكن استخدام الميزان الموجود عند بائع الخضروات لقياس
كتلة الذهب او العكس

_ كتلة الجسم عند التوان تساوى مجموع كتل الاثقال معلومة الكتلة

_ كتلة الجسم مقدار ثابت فى اى مكان من الكون فعند قياس كتلة جسم على سطح الارض ثم قياس نفس الجسم على سطح القمر نجد انها لا تتغير

اكمل العبارات الاتية:

1-تقاس الكتلة بوحدة........... او.............

2-تقاس الكتلة باستخدام............

3- الكتلة مقدار ثابت لا يتغير بتغير..............

4- كتلة الجسم عند التوازن تساوى.............

اجب عن الاسئلة الاتية:

عرف الكتلة؟

ما هى وحدة قياس الكتلة؟

اكتب المفهوم العلمى:

وحدة قياس الكتلة وتكافىء تقريبا لتر من الماء.

درس انهاردة اسمه الوزن

زى ما اتكلمنا قبل كدة عن الكتلة وعرفنا تعريفها ايه وايه وحدة قياسها وازاى نقيسها دلوقتى برضو هنعمل كده مع الوزن

طبعا احنا عارفين من دراستنا قبل كدة انى لو عندى جسم ساكن فالجسم دة مبيتحركش الا اذا سحبته او دفعته بعيد عنى
يعنى لو عندى كورة هتفضل فى مكانها ومش هتتحرك الا اذا انا زقيتها بعيد عنى او سحبتها ناحيتى

وعشان كده برضو لما ارفع جسم لفوق واسيبه بيقع تانى على الارض وده معناه
ان فيه قوة بتجذب الاجسام للارض واحنا بنحس بالقوة دى لما حاجة تقع من
ايدنا على الارض وهو ده بالظبط تعريف الوزن

يبقى انا كدة عندى تعريف للوزن وهو قوة جذب الارض للجسم

والقوة دى دايما بيبقى تاثيرها فى اتجاه مركز الارض وعشان كدة عمرنا ما شوفنا حاجة بتقع لفوق بدل ما تقع اتحت

ومن تعريف الوزن طبعا بنقدر نفهم ليه لما بنط لفوق بنقع تانى على الارض ودة طبعا بسبب الجاذبية الارضية

وبنفهم برضو ليه رائد الفضاء بنشوفه وكانه بيسبح فى الهوا ودة عشان مفيش فى الفضاء جاذبية ارضية

وعشان مفيش قوة جاذبية فى الفضاء بنلاقى ان لما رائد
الفضاء يمسك حاجة ويسيبها بتسبح فى الفضاء حتى لو كانت الحاجة دى فى حجم
الدولاب ودة طبعا بيرجع لانعدام الجاذبية فى الفضاء

وبكدة نعرف ان القوة اللى بتخلى الاجسام تقع على الارض واللى برضو مبيظهرش تاثيرها داخل المركبة الفضائية هى قوة اجاذبية الارضية

طيب يا ترى ايه هى وحدة قياس الوزن؟

وحدة قياس الوزن هى النيوتن

والنيوتن = وزن جسم كتلته 100 جرام

يعنى مثلا لو عندى تفاحة كتلتها 100 جرام يبقى وزنها واحد نيوتن

_ طيب ازاى اقدر اقيس الوزن؟

نقدر نقيس الوزن باستخدام الميزان الزنبركى ( يا ريت كلنا نشوف شكله فى الكتاب ) هنلقيه بيتكون من جزء فيه سلك زنبركى وجمبه تدريج رقمى وبينتهى بخطاف

واحنا بقى بنحدد الوزن بمقدار التمدد فى السلك الزبركى ودة هنعرفه من النشاط:

الادوات اللى هنحتاجها 1- ميزان زنبركى

2- الجسم المراد قياسه

الخطوات:

1- هنمسك الميزان الزنبركى من الحلقة العلوية وبعدين نعلق الجسم فى الخطاف
السفلى واذا مقدرناش نعلق الجسم فى الخطاف فنربطه بخيط وبعدين نعلق الخيط
فى الخطاف

2- هنسيب الجسم ينزل ببطء وفى الوقت ده هنلاحظ ان الجسم بيسحب السلك الزنبركى لتحت ونلاقى قراية التدريج بتزيد

3- نستنى لما يستقر الجسم خالص وبعدين نقرا الرقم على التدريج والرقم اللى هيطلع معانا هو دة وزن الجسم بالنيوتن

العوامل اللى بيتوقف عليها الوزن:

عندنا 3 عوامل هى:

1- كتلة الجسم

2- كتلة الكوكب الموجود عليه الجسم

3- بعد الجسم عن مركز الكوكب

اول حاجة هنبدا بيها هى:

1- كتلة الجسم:

عشان نعرف ازاى كتلة الجسم بتاثر على وزنه هنعمل النشاط دة:

الادوات:
_ ميزان ذو كفتين
_ ميزان زنبركى
_اجسام مختلفة الكتلة

الخطوات:

1-اول حاجة هنعين كتلة الجسم الاول باستخدام الميزان ذو الكفتين
2- هنعين وزن الجسم الاول باستخدام الميزان الزنبركى

3- هنكرر الخطوتين اللى فاتو مع باقى الاجسام

4- هندون النتايج فى جدول ( يا ريت نشوف الجدول فى الكتاب)

هنلاقى ان

كتلة الجسم الاول= ا كيلو جرام .......... ووزنه= 10 نيوتن

كتلة الجسم التانى= 2 كيلو جرام.......... ووزنه= 20 نيوتن

كتلة الجسم التالت= 3 كيلو جرام ......... ووزنه= 30 نيوتن

كتلة الجسم الرابع= 4 كيلو جرام.......... ووزنه = 40 نيوتن

كتلة الجسم الخامس= 5 كيلو جرام......... ووزنه= 50 نيوتن

ومن النشاط دة بنستنتج ان:

وزن الجسم على سطح الارض بيزيد بزيادة كتلته وده بنقدر نحسبه من العلاقة دى:

الوزن بالنيوتن= الكتلة بالكيلوجرام × 10

- كتلة الكوكب الموجود عليه الجسم:

وزن الجسم بيختلف باختلاف الكوكب اللى موجود عليه الجسم ليه؟؟؟؟؟؟؟؟؟

لان كل ما كتلة الكوكب بتزيد جاذبيته بتزيد وبالتالى وزن الجسم بيزيد

يعنى مثلا لو قيست وزن جسم على سطح الاض وبعدين قيست وزن نفس الجسم على سطح القمر هلاقى الوزن تغير

لو وزن الجسم على الارض 6 نيوتن هيبقى على القمر واحد نيوتن ودة لان وزن الجسم على سطح القمر بيساوى سدس وزنه على سطح الارض

- بعد الجسم عن مركز الكوكب:

بيتاثر وزن الجسم بمقدار البعد عن الكوكب لان قوة الجاذبية
الارضية بتقل لما الجسم يبعد عن الارض وعشان كدة الشخص الموجود فى الطيارة
او المنطاد وزنه مبيكونش هو نفس وزنه على الارض لان شد الجاذبية الارضية
له بيكون اضعف

الملخص اللى هنذاكره:

_ الاجسام الساكنة لا تتحرك ما لم تدفع او تسحب

_ القوة التى تجعل الاجسام تسقط لاسفل والتى لا يظهر تاثيرها داخل المركبة الفضائية هى قوة الجاذبية الارضية

تعريف الوزن: قوة جذب الارض للجسم وتؤثر هذه القوة دائما تجاه مركز الارض

_ وحدة قياس الوزن هى : النيوتن

_ النيوتن = وزن جسم كتلته 100 جرام

_ قياس الوزن: يمكن قياس الوزن باستخدام الميزان الزنبركى وذلك بتحديد مقدار التمدد فى السلك الزنبركى بسبب الوزن

_ العوامل التى يتوقف عليها الوزن:

1- كتلة الجسم......... 2- كتلة الكوكب الموجود عليه الجسم..........3- البعد عن مركز الكوكب

ا- كتلة الجسم:

يزداد وزن الجسم على سطح الارض بزيادة كتلته وذلك وفق العلاقة التاليه:
الوزن بالنيوتن = الكتلة بالكيلو جرام× 10

2- كتلة الكوكب الموجود عليه الجسم:

يختلف وزن الجسم باختلاف الكوكب او (القمر) الموجود عليه الجسم فكلما زادت كتلة الكوكب زادت جاذبيته وزاد وزن الاجسام عليه

_ وزن الجسم على سطح القمر يساوى سدس وزنه على سطح الارض

3- البعد عن مركز الكوكب:

يتاثر وزن الجسم بمقدار البعد عن مركز الكوكب فقوة الجاذبية الارضية
تتناقص بابتعاد الجسم عن الارض فالشخص فى الطائرة او المنطاج لا يكون وزنه
بقدر ما يزن على الارض لان شد الجاذبية الارضية له يكون اضعف

_ المقارنة بين الكتلة والوزن نذاكرها كويس من الجدول فى الكتاب

يا ر

السؤال الاول

_ اكمل العبارات الاتيه:

1- تقاس الكتلة ب.......... او........... بينما يقاس الوزن ب..................

2- وحدة قياس الكتلة هى............ بينما وحدة قياس الوزن هى ...................

3-لا تتغير الكتلة بتغير .................

4-الكيلو جرام يساوى............... بينما النيوتن يساوى....................

5- كتلة الجسم عند التوازن تساوى................

6- وزن الجسم على سطح القمر يساوى........... وزنه على سطح الارض

7- الاجسام الساكنة لا تتحرك ما لم ......... او ...........

8- قوة جذب الارض للجسم تؤثر دائما تجاه...............

9- يمكن قياس الوزن باستخدام ......... وذلك بتحديد...................................

10- العوامل التى يتوقف عليها الوزن هى........... و...............و...................

11- الوزن بالنيوتن =.....................

12- كلما زادت كتلة الكوكب زادت................ وبالتالى زاد.....................

13- الشخص فى الطائرة لايكون وزنه بقدر ما يزن على الارض لان...................

السؤال الثانى:

قارن بين الكتلة والوزن؟
السؤال الثالث:

_ ضع علامة صح او علامة خطا امام العبارات الاتيه مع تصويب الخطا:

1- وزن الجسم على سطح الارض يساوى 6 اضعاف وزنه على سطح القمر (........)

2- يتاثر وزن الجسم بمقدار البعد عن مركز الكوكب (.........)

3- كلما ارتفع الشخص عن الارض زاد وزنه (..........)

4- تؤثر الكتلة دائما فى اتجاه مركز الارض (.........)

5- وحدة قياس الوزن هى الكيلو جرام (..........)

6- كلما زادت كتلة الكوكب قل وزن الجسم (...........)

7- يزداد وزن الجسم على سطح الارص بزيادة كتلته (..........)

8- الكيلو جرام = 100 جرام (.........)

9- يمكن استخدام الميزان الموجود عند بائع الخضراوات لقياس كتلة الذهب(......)

السؤال الرابع:

_ اكتب المفهوم العلمى:

1- مقدار ما يحتويه الجسم من مادة

2- وحدة قياس الكتلة وهو يكافىء لتر من الماء

3- قوة جذب الارض للجسم

4- وحدة قياس الوزن وتكافىء وزن جسم كتلته 100 جرام

السؤال الخامس:

اذكر العوامل التى يتوقف عليها الوزن مع شرحها بالتفصيل؟

السؤال السادس:

_ اجب عن المسالة الاتية:

س1:
جسم كتلته على سطح الارض = 6 كيلو جرام , احسب وزنه على سطح الارض وعلى سطح القمر.

س2:

جسم وزنه 20 نيوتن على سطح الارض فما هى كتلته؟

س3:

اذا كانت كتلة جسم = 30 كجم على سطح الارض فاحسب:

ا- كتلته على سطح القمر

ب-وزنه على سطح الارض

ج- وزنه على سطح القمر

-الكيلو جرام يساوى......1000 جرام......... بينما النيوتن يساوى...وزن جسم كتلته 100 جرام..............

2- يمكن قياس الوزن باستخدام .الميزان الزنبركى........ وذلك بتحديد...مقدار التمدد فى السلك الزنبركى بسبب الوزن................................

3- الوزن بالنيوتن =...الكتلة بالكيلوجرام× 10...............

4- كلما زادت كتلة الكوكب زادت..جاذبيته.............. وبالتالى زاد.........وزن الجسم عليه............

اسئلة مهمة:

علل لما ياتى:

(1) يستخدم الميزان ذو الكفتين فى قياس كتل الاجسام؟

لانه عند حدوث التوازن بين الكفتين تكون كتلة الجسم مساوية لمجموع كتل الاجسام معلومة الكتلة

(2) لا تتغير الكتلة من مكان لاخر؟

لان مقدار ما يحتويه الجسم من مادة ثابت فى اى مكان وعلى اى كوكب

(3) كتلة الجسم على الارض تساوى كتلته على القمر؟

لان الكتلة ثابتة فى اى مكان لاتتغير

(4)تحتاج السيارة الى قوة اصغر من القطار لتحريكها او ايقافها؟

لان كتلة السيارة اقل من كتلة القطار

(5) تختلف كتلة جسم ما عن وزن نفس الجسم؟

لان الكتلة هى مقدار ما يحتويه الجسم من مادة بينما الوزن هو قوة جذب الارض للجسم

(6)يستخدم الميزان الزنبركى فى تعيين وزن الجسم؟

لان وزن الجسم يسبب تمدد السلك الزنبركى بمقدار يزيد كلما زاد وزن الجسم

(7)يبدو رائد الفضاء وكانه يسبح داخل مركبة الفضاء؟

بسبب انعدام الجاذبية

(8) يفضل شراء البضاعة من الخارج بالكتلة وليس الوزن؟

لان الكتلة ثابتة فى اى مكان لا تتغير بينما الوزن يتغير من مكان لاخر

(9) يتغير الوزن من مكان لاخر؟

بسبب القرب او البعد عن مركز الارض

(10) يتوقف الوزن على كتلة الجسم؟

لان زيادة الكتلة او نقصها يعمل على زيادة الوزن او نقصه لان عجلة الجاذبية ثابتة

(11) الوزن على القمر اقل من الوزن على الارض؟

لان الجاذبية على القمر اقل من الجاذبية على الارض

(12) وزن الجسم على سطح القمر يساوى سدس وزنه على سطح الارض؟

لان الجاذبية على سطح القمر تساوى سدس الجاذبية على سطح الارض

(13) وزن الجسم فى الطائرة اقل من وزنه على سطح الارض؟

لان كلما ابتعدنا عن سطح الارض تقل الجاذبية وبالتالى يقل وزن الجسم

» علوم سادس ابتدائى
» علوم رابعه ابتدائى
» يسر منتديات مالك وانس ان يكون بها الموطأ (للامام مالك)متجدد
» طرق تصل بك الى بر الوالدين--مع مالك وانس
» تجـــــــــــــــــول مع مالك وانس --روعه